Түркістанда 100 оқушыға грант берілді — BAQ.KZ

Түркістандағы Ахмет Ясауи университетінде IV Республикалық «Ясауи» пәндік олимпиада қорытындысы жарияланды. Үздік деп танылған 100 оқушыға грант берілді, деп хабарлайды Baq.kz.

Республикалық олимпиадаға 14 облыстан және Астана, Алматы қалаларынан 11-сыныптың 7 мыңға жуық оқушысы қатысты. Жасөспірімдер 11 пән бойынша білімдерін сарапқа салып, тек үздіктері жеңіске жетті.

Олимпиаданы қорытындылаған университет ректоры, профессор У.Әбдібеков және университеттің Даму және қаржыландыру жөніндегі вице-президенті М.Эрен жеңімпаздарға 1,2,3 дәрежелі Қ.А.Ясауи атындағы Халықаралық қазақ-түрік университетінің білім гранты дипломын табыстады. Өз білімдерімен оқ бойы озып шыққан 100 грант иегеріне ҰБТ-дан 50 баллдан жоғары жинау шартымен Ахмет Ясауи университетінде тегін білім алу құқығы берілді.

«Бүгінгі бәсекеден университет грантына ілікпей қалған қатысушыларға да үлкен жеңілдіктер қарастырылып отыр. Егер сіз мемлекеттік грантты иелене алмасаңыз, ҰБТ-да жинаған 50 ұпаймен осы сертификатпен ақылы негізде 25 пайыздық жеңілдікпен білім ала аласыздар»,-деген профессор У.Әбдібеков барлық жеңімпаздарды құттықтады.

Университеттің баспасөз қызметі хабарлағандай, грант жүлдегерлері білім додасының әділ нәтижесіне ризашылықтарын білдіріп, ерекше қуаныштарын жеткізді. Университеттің жетістіктері мен кампусының салтанатына қаныққан оқушылар, оқу орынның студенті болуды өздеріне мақсат ететіндіктерін де жасырмады.

Айта кетейік, үш айға жалғасқан олимпиаданың І іріктеу кезеңі – online түрде 2017 жылдың 1-4 наурыз күндері өткізіліп, жалпы 6600 оқушы қатысқан болатын. ХҚТУ базасындағы ІІ кезеңге 2351 оқушы өтіп, ақтық білім сайысында 1200 оқушы бақ сынады