Филология факультеті

Факультет тіл мамандықтары бойынша білім беру бағдарламалары мен оқу жоспарларының және пәндердің жұмыс оқу бағдарламаларының әзірленуі мен тәжірибеде қолданылуын қадағалайды, маман дайындау сапасының құзіретін қалыптастырады. Кафедралардың оқу, тәрбие және ғылыми жұмыстарына басшылық жасайды. Оқу-тәрбие үдерісінің ғылыми-әдістемелік және оқу-әдістемелік бағытын үйлестіреді. Құрылымның Даму стратегиясын әзірлеп, жұмыс берушілермен байланыстар орнатады. Мамандар дайындау бағыттары бойынша білім беру қызметінің нарығын зерделейді.

Факультеттің негізгі мақсаты: барлық түркі тілдес мемлекеттер мен қауымдастықтардан келген жастарды достық пен бауырмашылдыққа баулумен қатар, қазақ, түрік, орыс, ағылшын, қытай, араб тілдерін терең меңгеруіне жағдай жасап, болашақ төртінші билік өкілдері – журналист мамандарын әзірлеуде сапалы қызмет ету болып табылады.

18
Мамандық
692
Студент
78
Жұмыспен қамтылған
117
ОПҚ

Ф.ғ.д., профессор Құлбек Ергөбектің «ХХ ғасыр басындағы түрік халықтар әдебиеті және Алашорда» (3 млн 724 мың теңге), ф.ғ.к., доцент Жанымкүл Қамалқызының «ҚРҰҒА академигі Р.Бердібай мұрасы мен зерттеулерінің түркілік және этнопедагогикалық әлеуеті» (6 млн теңге), оқытушы Кенан Яванның «Мәдени мұра бағдарламасы аясында ұлттық құндылықтарды қайта жаңғырту (ОҚО, Қошқар ата аулында табылған байырғы түркі жазба ескерткіштерінің қазіргі қазақ тілімен (түрік тілі) тарихи салыстырмалы талдауы)» (2 млн теңге), ф.ғ.к., Ашимов Рустамның «Жоғары және ЖОО-дан кейінгі білім беру үдерісінің ортақ терминологиялық бағасын қалыптастыру» (1,5 млн теңге) ҚР БжҒ министрлігі қаржысы тарапынан қаржыландырылды. Жыл сайын «Бердібай оқулары», «Балақаев оқулары» атты республикалық ғылыми-теориялық конференциялар ұйымдастырылып тұрады. 2016 жылы «Құлбек Ергөбек және қазіргі түріктану» атты халықаралық ғылыми-теориялық конференция ұйымдастырылды. Елбасымыздың «Мәңгілік ел» идеясы негізінде «Мәңгілік елдің өшпес дәлелдері: дәстүр, тіл, өнер» атты ғылыми жоба (ғылыми жетекшісі ф.ғ.к., доцент Ж..Камалқызы) ұйымдастыруда. Жобаға 5В020500-Филология: қазақ тілі мамандығының студенттері Ғабит Нұсқабай, Оспан Жүсіп, Шәкіржан Естемес, Долқын Нұрсәуле қатысуда.

Факультетте студенттердің түрлі бағыттағы клубтары жұмыс істейді. «Шолпы» клубы студент қыздардың тәрбиесіне көңіл бөлетін болса, осы клубтың ұйымдастыруымен өткен «Біз мәдениеттіміз бе?» тақырыбындағы ашық отырыстарына университеттің басқа мамандықтарынан да студенттер қатысып, қызу пікірталастар өтті. Бұдан өзге «English Club», «Мәрхаба» студенттік клубтары мен үйірмелері жұмыс істейді. Әртүрлі қауымдастықтар мен ұлыстардан келген студенттерден құралған топтарда «Ізгілік иірімі», «Кекшіл болма, көпшіл бол», «Сүйем туған тілімді», «Батырға тағзым», «Отан оттан да ыстық», «Қызды қырық үйден тыю», «Отан үшін отқа түс-күймейсің», «Болашағымыз-бірлікте» тақырыптарында ұйымдастырылған іс-шаралар өте сәтті өтті.

«Мевлана» бағдарламасы бойынша А.Байниязов – Ардахан университетінде (Ардахан қаласы), Д.Маметова — Джумхуриет университетінде (Сивас қаласы), Е.Өмирбаев – Джумхуриет университетінде (Сивас қаласы), Ы.Нурмагомбетова – Битлис Эренуниверситетінде (Битлис қаласы), С.Нышанова, М.Сейтова, Г.Макенова, А.Ермекбаевалар Фатих университетінде (Түркия) білім жетілдіру курстарынан өтсе, М.Сейтова АҚШ-тың Buffalo университетінде, Ф.Дадажанов Ұлыбританияның Cambridge университетінде және З.Сахитжанова және Р.Әділбаевалар Нидерландияның Лейден университетінде «Болашақ» халықаралық бағдарламасы бойынша ғылыми тағлымдамадан өтті. Фаукультет оқытушылары Б.Тұрлыбеков пен Р.Батырханова Ұлыбританияның Лестер университетінде тәжірибе алмасу курстарында жүр.

Студенттер республикалық ғылыми-зерттеу жұмыстарының байқауларында жүлделі орындарды иеленді: 5В011900-Шетел тілі: екі шетел тілі: ағылшын және түрік тілі, 5В011700-Қазақ тілі мен әдебиеті, 5В050400-Журналистика мамандықтарының студенттері Ш.Абдусаттарова, Э.Абдумауленова, М.Әленова, Д.Тұрғынбаева, Р.Халдарбек, Б.Қаратілекова, Ж.Әшірбекова, М.Төребек Білім және ғылым министрлігінің 2-ші және 3-ші дәрежелі Дипломдарымен марапатталған. 2016 жылы өткізілген студенттердің Республикалық ғылыми конференциясында 5В011900-Шетел тілі: екі шетел тілі мамандығының студенті Ж.Хайруллаев 3-ші орынды иеленді. Абылай хан атындағы Қазақ Халықаралық қатынастар және Әлем Тілдері университетінде өткен  республикалық пәндік олимпиадасында 5В021000-Шетел филологиясы: түрік тілі, 5В011900-Шетел тілі: екі шетел тілі: ағылшын және түрік тілі мамандықтарының студенттері жүлделі орындарға ие болды. 2016 жылы Қазақстан Республикасының жоғары оқу орындарының арасында жүргізілген  рейтинг бойынша 5В011900-Шетел тілі: екі шетел тілі мамандығы 2-орын, 6М021200-Түркітану мамандығы 3-орынға ие болды. ОЖСБ нәтижесі бойынша жекелей пәндік көрсеткіші жоғары болған факультет оқытушылары А.Қарпықбаева мен С.Чаканова университет тарапынан қаржылай марапатталды.