Іс-шаралар

Ахмет Ясауи атындағы Халықаралық қазақ-түрік университеті мен Түркістан облысының Мемлекеттік кірістер департаменті арасында маңызды ынтымақтастық меморандумына қол қойылды.

Аталған құжат YASAWI-STARTUP бағдарламасы аясында жүзеге асырылып жатқан «AI-Keden» жобасын одан әрі дамыту және оны тәжірибеге енгізу мақсатында екі тараптың өзара әріптестігін нығайтуға бағытталды.

«AI-Keden» жобасы заманауи цифрлық және жасанды интеллект технологияларын қолдану арқылы мемлекеттік кірістер қызметтерінің сапасын арттыруды, сондай-ақ сыртқы экономикалық қызметке қатысушылар үшін қызметтерді анағұрлым қолжетімді әрі тиімді етуді көздейді.

Қол қойылған меморандум өңірдің экономикалық дамуына серпін беріп, цифрландыру үдерісін жеделдетуге және инновациялық шешімдерді мемлекеттік басқару саласына енгізуге ықпал ететіні атап өтілді.

Бұл келісім Түркістан өңіріндегі инновациялық экожүйені дамыту жолындағы маңызды әрі нақты қадамдардың бірі болды.