Хабарландырулар

  • image image image image
    • shape
    shape

    Жаңалықтар

    Blog Image
    Түлектеріміз 05.02.2025

    Кентау-Түркістан тас жолының 5-км жантүршігерлік жол апаты болды.

    2025 жылдың 3 ақпанында Кентау-Түркістан тас жолының 5-км жантүршігерлік жол апаты болды. Апат салдарынан қаза болған 6 адамның ішінде біздің өрімдей жап-жас студенттеріміз Нұрай Қаратай мен Шұғыла Сейсенбек те бар екен.
    Қыршынынан қиылған қарагөздеріміздің қазасы жанымызға батты.
    Ахмет Ясауи түлектері атынан марқұмдардың отбасына қайғыра көңіл айтамыз.
     
    Жылдамдықты арттырма!
    Жол үстінде желіп жүрген бауырым,
    Қаламасаң қасіреттің дауылын.
    Екпініңді сәл бәсеңдет – сені үйде,
    Күтіп отыр бала-шағаң, ауылың...
    Озамын деп алдағыдан алқынба,
    Саған үміт артқан «ел бар» артыңда.
    «аман ердің аты шығар сабырлы» –
    Деген сөз бар баяғыдан халқыңда.
    Қарсы ұмтылма ажал деген пышаққа,
    Сыймай кеткен адам аз ба құшаққа.
    Жылдамдықты игере алмай жер түгіл,
    Құлап жатыр аспандағы ұшақ та...
    Көлік міндім, заулап желдей естім деп,
    Қателессең артпа жұртқа еш міндет...
    Екі сағат жолдан ерте келсең де,
    Уақыттан озып көрген ешкім жоқ.
    Аямайды темір-құрсау зат деген,
    Соғыстан да көбейді өлім, әттеген!
    Ата-бабаң қалған емес ешкімнен,
    Талай ғасыр жүрседағы атпенен.
    Сен сақтансаң, сақтайды ғой «көкте егең»,
    Қыл көпірден ешкім аман өтпеген...
    Өзгелердің өмірімен ойнама,
    Қызық көріп ойнасаң да отпенен.
    Желікті қой, аласұрма астам ғып,
    Қадамыңды ойла, жаса бастан нық.
    Түзу жолда жылдамдықты сақтамай,
    Өзіңе өзің жасап жүрсің қастандық!
    Кінәламас өз атына лайықты ұл,
    Әрбір істің астарына байып қыл.
    Біздер кейде өкіметке орынсыз,
    Өкпелейміз салыпты деп айыппұл...
    Қызық көрмей жап-жас болып тым әлі,
    Талай тағдыр орта жолда сынады.
    Қателікті жол ешқашан кешпейді,
    Біз өзіміз, бәріне де кінәлі.
    Әй, бауырым, тізгініңді тарт, тыңда!
    Қалыңдатпа қайғысын жас, қарттың да!
    Бақытты өмір сүргің келсе, өтінем,
    Тәртіп сақта, жылдамдықты арттырма!
    Өлең авторы
    Асқар Дүйсенбі
    1995 жылғы түлек
    05.02.25