Орталықтың негізгі мақсаты

Симуляциялық орталықтың негізгі мақсаты

Симуляциялық орталықтың негізгі мақсаты — медициналық білім алушылар мен медицина мамандарына клиникалық жағдайларға барынша жақындатылған, қауіпсіз және заманауи симуляциялық ортада практикалық дағдыларды меңгеруге, клиникалық ойлау мен шешім қабылдау қабілетін дамытуға және кәсіби құзыреттерін жетілдіруге жағдай жасау.

Негізгі міндеттері

медициналық білім алушылардың практикалық және клиникалық дағдыларын қалыптастыру және жетілдіру;

клиникалық жағдайларды симуляциялау арқылы теориялық білімді практикамен ұштастыру;

шұғыл және өмірге қауіп төндіретін жағдайларда медициналық көмек көрсету дағдыларын пысықтау;

клиникалық ойлау, шешім қабылдау және командалық жұмыс қабілеттерін дамыту;

симуляциялық технологиялар арқылы кәсіби дағдыларды қайта-қайта қауіпсіз түрде пысықтауға және бағалауға мүмкіндік беру;

ОҚКЕ (OSCE) арқылы білім алушылардың практикалық құзыреттерін объективті бағалауды қамтамасыз ету;

заманауи симуляторлар, муляждар, фантомдар және медициналық жабдықтарды пайдалана отырып, клиникалық ортаға барынша жақын оқу кеңістігін қалыптастыру;

отандық және халықаралық озық тәжірибені оқу үдерісіне енгізу.

Оқыту бағыттары

Орталықта білім алушылардың практикалық дағдылары терапия, хирургия, жалпы хирургия, акушерия және гинекология, педиатрия, неврология, жалпы дәрігерлік практика, жедел медициналық көмек және өмірді қолдау бағыттары бойынша жетілдіріледі.

Оқыту барысында медициналық манекендер, муляждар, фантомдар, робот-симуляторлар, тренажерлар және заманауи медициналық жабдықтар пайдаланылады.

Кәсіби мамандарды дамыту

Симуляциялық орталықтың қызметі бакалавриат білім алушыларын даярлаумен ғана шектелмейді. Орталықтың даму бағыттарының бірі — дәрігерлер мен мейіргерлердің біліктілігін арттыру және үздіксіз кәсіби білім беру жүйесінде симуляциялық оқыту мүмкіндіктерін пайдалану.

Бұл бағытта медициналық мамандардың практикалық дағдыларын жетілдіруге, клиникалық сценарийлерді модельдеуге, шұғыл медициналық көмек көрсету мен командалық әрекеттерді пысықтауға арналған оқу мүмкіндіктерін кеңейту көзделуде.

Күтілетін нәтиже

Симуляциялық оқытудың басты нәтижесі — қауіпсіз ортада дағдыны қалыптастыру, тәжірибені бірнеше рет қайталау, қателерді талдау және клиникалық практикаға сенімді дайындалу.

Орталықтың түпкі мақсаты — білімді практикамен ұштастыра алатын, клиникалық ойлауы қалыптасқан, кәсіби құзыретті және пациент қауіпсіздігін бірінші орынға қоятын медицина мамандарын даярлауға үлес қосу.