Жаңалықтар

Бүгін университетімізде Бейнелеу өнері кафедрасының ұйымдастыруымен «Тәуелсіздік рухы: ұлттық код және заманауи сән» атты шығармашылық көрмесі мен байқауы өтті. 

Көрме 16 желтоқсан – Тәуелсіздік күніне арналып,  «Тәуелсіздік – айғағым, желбіре көк байрағым» тақырыбы аясында ұйымдастырылды.
Іс-шараның мақсаты – қолданыстан шыққан киімдерге жаңа тыныс беріп, қайта өңдеу арқылы олардың мәнін арттыру, сондай-ақ жас дизайнерлердің шеберлігі мен шығармашылық әлеуетін көрсету.

Көрменің лентасын Академиялық мәселелер жөніндегі вице-ректор Эльмира Идрисова, Әлеуметтік-мәдени даму жөніндегі вице-ректор Еділ Төлегенов және Ө.Жәнібеков атындағы ОҚПУ-дың педагогика ғылымдарының докторы, профессор Қуандық Ералин қиды.

Байқауда дизайн мамандығының 20 студенті өз жұмыстарын ұсынып, қазылар алқасына таныстырды. Шығармашылық жұмыстарды бағалау үшін қазылар алқасы құрамында Ө.Жәнібеков атындағы ОҚПУ-дың профессоры Қуандық Ералин мен магистр-оқытушысы Зульфия Иманколова және стилист, DNKA SHOWROOM негізін қалаушы Анар Серікбаева болды.

Байқау қорытындысы бойынша І орын Ұлжан Тасқұлға бұйырды. ІІ орынды Сара Ақылбекқызы мен Аяжан Серікбай алды. Ал ІІІ орынды Назым Стамбекова , Алвина Тасыбек мен Аружан Самен  иеленді.

Айта кетейік, шара барысында Бейнелеу өнер кафедрасының аға оқытушысы Динара Есеналиеваның жетекшілігімен,  2025 жылғы бітіруші түлектер дайындаған «Самғау» коллекциясынан сәндік дефиле де өтті.