Жаңалықтар

Оқу ордамызда өтіп жатқан IV Қысқы мектептің төртінші күні  «Цифрландыру және Жасанды интеллект» тақырыбына арналды. Жиын спикері – ректор өкілі м.а, Инженерия факультетінің деканы Нажи Генч болды. 

Ол «Университеттердегі цифрлық трансформация: білім беруден басқаруға жаңа көзқарас» тақырыбында баяндама оқыды. Сөз басында: «Қысқы мектептің жұмысы университетіміз үшін аса маңызды. Жыл сайын оқу ордамыздың қарыштап дамуына не қажет екенін талдап, қысқы мектеп бағдарламасына қосамыз. Жаңа ақпараттар беріп, пікір алмасамыз»,-деді.

Семинар барысында спикер жоғары оқу орындарындағы цифрлық трансформацияның мәні мен оның бүгінгі күндегі қажеттілігіне кеңінен тоқталды. Жаһандық деңгейде университеттер арасында бәсеке күшейіп, білім беру сапасы мен басқару тиімділігі цифрлық мүмкіндіктер арқылы айқындалатынын жеткізді.

Нажи Генч жиында цифрлық трансформацияның негізгі бағыттары – технологиялық инфрақұрылым, адам ресурстары және корпоративтік мәдениет туралы кеңінен айтты. Университетті басқаруда электронды қолтаңба жүйелері, автоматтандырылған кадрлық, қаржылық және студенттік қызметтерді енгізудің тиімділігін жіктеп, түсіндірді. Сондай-ақ, жасанды интеллекттің деректерді талдау, болжау және автоматтандырудағы әлеуетін тілге тиек етті. Сөз соңында цифрлық өзгерістерді жүйелі жүзеге асыру университетіміздің бәсекеге қабілеттілігін арттыратынын айтты.

Семинардың екінші бөлімін спикер ретінде  – Ақпараттық технологиялар департаментінің директоры м.а Ерболат Тұрсынбек пен Цифрлық офицер Абылай Тастанбеков жүргізді. Олар «Білім беру, ғылым және басқару процестерін цифрландыру және жасанды интеллектіні қолдану» тақырыбында ой өрбітті.

Спикерлер оқу ордамызда автоматтандырылған бизнес-процестердің үлесі туралы ақпарат берді. Оның қатарында: Luna электронды құжат айналымы, Platonus бағдарламалары бар.

Сондай-ақ, университетіміздің ресми AYU WEB сайтының әлеуетін таныстырып, жаңа мүмкіндіктерін атады.

Алдағы уақытта іске қосылатын «KPI», «support.ayu.edu.kz» қосымшаларын таныстырып, қызметкерлердің тапсырма алу мен орындау процестерін жеңілдететін құрал екенін айтты.

Академиялық процестер: оқу жоспарларын бекіту, пәндер мен кредиттерді тіркеу, студенттің оқу траекториясын цифрлы түрде бақылауға арналған SMART AYU 2.0 жөнінде кеңінен атап өтті. Оның стратегиялық және ғылыми бағыттарға, басқару мен әлеуметтік блокқа қосар үлесін таныстырды.

Қысқы мектеп аясындағы бұл күн қатысушыларға цифрландыру мен жасанды интеллекттің университетті дамытудағы рөлін жан-жақты түсінуге мүмкіндік берді. Семинар барысында ұсынылған тәжірибелер мен цифрлық шешімдер университеттегі басқару мен академиялық үдерістердің тиімділігін арттыруға бағытталды.