Жаңалықтар

Бүгін университетімізде оқытушы-профессорлар мен қызметкерлер арасындағы факультетаралық ХХХIV Спартакиада өз мәресіне жетті.

Дәстүрлі түрде ұйымдастырылатын бұл спартакиаданың негізгі мақсаты – оқытушылар арасында салауатты өмір салтын кеңінен дәріптеу, денсаулықты нығайту және спорт түрлері бойынша университеттің құрама командаларын қалыптастыру.

Жарыс барысында командалар спорттың 7 түрінен өзара бақ сынады. Атап айтқанда: кіші футбол, волейбол (ерлер мен қыздар), ату спорты, тоғызқұмалақ, шахмат және арқан тартыс.

Спорттық доданың шешуші күні «Арқан тартыс» сайысына арналды. Білек күші мен төзімділікті талап ететін бұл жарыс аса тартысты өтті. Әр команданың жанкүйерлері қызу қолдау көрсетіп, көрермендер әсерлі ойынның куәсі болды.

Жабылу салтанатында сөз сөйлеген әлеуметтік-мәдени даму жөніндегі вице-ректор Еділ Төлегенов: «Құрметті университетіміздің оқытушы-профессорлар құрамы, биылғы ХХХIV оқытушылар арасындағы спартакиада өз мәресіне жетті. Жарыс жоғары деңгейде әрі қызықты өтті деп ойлаймын. Бұл жарыстың басты мақсаты – оқытушылар арасындағы ынтымақтастықты арттырып, өзара достықты нығайту. Аталған мақсат толық жүзеге асты деп сенемін. Барлық қатысушыға алғысымды білдіремін», – деді.

Жарыс нәтижесінде «Түркістан Ахмет Ясауи кәсіби колледжі» командасы чемпион атанды. Кентау кампусының командасы жүлделі II орынды иеленсе, Стоматология факультетінің құрама командасы III орынға лайық деп танылды. Сонымен қатар, сайыс барысында ерекше белсенділік танытқан қатысушылар арнайы марапаттарға ие болды.