Жаңалықтар

Білімгеріміз Дінмұхаммед Үмбетұлы Қазақстан Республикасы Ғылым және жоғары білім министрлігінің жанындағы Республикалық студенттік кеңестің ІV отырысында Түркістан облысының студенттік омбудсмені болып тағайындалды. 

17-18 шілде күндері Астана қаласында Ғылым және жоғары білім министрі Саясат Нұрбектің қатысуымен Республикалық студенттік кеңес мүшелері, «Қазақстан студенттерінің Альянсы», РСҚ-ның өңірлік төрағалары және өңірлік студенттік омбудсмендердің басын қосқан жиын өтті. 

Айтулы іс- шараға әр өңірдің ЖОО-нан 100-ге жуық белсенді студент қатысып, білім беру саласындағы өзекті мәселелерді талқылады. 

Студенттік кеңес отырысына Дінмұхаммед Үмбетұлы – Қазақстан Студенттерінің Альянсы  Түркістан облыстық төрағасы ретінде белсене қатысты. 

Жиын барысында сөз алған жас төраға Дінмұхаммед: 

«Ендігі кезекте, біздің басты мақсат –  Түркістан облысының жастарын қоғамдық белсенділікке тарту және құқықтарын қорғай отыра, патриот жастардың қатарын арттыру»,-деді.

Осылайша, басқосуда  Дінмұхаммед Үмбетұлы ресми түрде Түркістан облысының студенттік омбудсмені атанды. 

Студенттік омбудсмендердің мақсаты – студенттердің құқықтары мен мүдделерін қорғау, сондай -ақ қолайлы білім беру ортасын құруға жәрдемдесу. 

Айта кетейік, Дінмұхаммед Үмбетұлы университетімізде 2022-2023 оқу жылында студенттік президенті қызметін атқарды.

Белсенді студентімізді айтулы жетістігімен шын жүректен құттықтаймыз!