Жаңалықтар

Бүгін университетімізде 2024-2025 оқу жылындағы №3 Сенат мәжілісі өтті. Жиынға Сенат мүшелері, құрылымдық бөлім басшылары, оқытушы-профессорлар құрамы қатысты.

Басқосу, әдеттегідей, университетіміздің оқытушы-профессорлар құрамын марапаттау және мерейтойларымен құттықтау рәсімімен бастау алды.

Университет ректоры Жанар Темірбекова және ректор өкілі м.а. Нажи Генч Қазақстан Республиксының Президенті Қасым-Жомарт Тоқаевтың Жарлығына сай, қос бірдей профессорға мемлекеттік наградаларды табыс етті. Түркология ғылыми зерттеу институтының директоры, профессор Шәкір Ибраев «Парасат» орденімен, ал профессор, композитор Бекжігіт Сердәлі «Ерен еңбегі үшін» медалімен марапатталды.

Сондай-ақ, оқу орнымыздың басшылары Экономика, басқару және құқық факультетінің оқытушысы Ботагоз Дандаеваны және Медицина факультетінің оқытушысы, б.ғ.к Раушан Қуандықованы мерейтойларымен құттықтап, сый-сияпаттар табыстады.

Бұдан әрі күн тәртібіндегі негізгі және әртүрлі мәселелер қаралды. Негізгі мәселелер: «Жоғары білімнен кейінгі білім беру бағдарламалары бойынша (магистратура және докторантура) 2024-2025 оқу жылына қабылданған білімгерлердің ғылыми жетекшілерін, магистранттардың диссертацияларының тақырыптарын бекіту» бойынша және  «2024-2025 оқу жылына арналған жоғары оқу орнына дейінгі, жоғары және жоғары оқу орнынан кейінгі білім беру бағдарламаларына білім алушыларды қабылдау қорытындылары туралы» баяндамашылар өз ұсыныстары мен есептерін айтты.

Сондай-ақ, басқосуда Университет ОПҚ-ның құжаттарын ғылыми атақ алу үшін ҚР ҒЖБМ Ғылым және жоғары білім саласындағы сапаны қамтамасыз ету комитетіне ұсыну туралы; Ахмет Ясауи университетінің ішкі кәсіби рейтингін анықтау ережесіне (УЕ-ХҚТУ-075-2023) өзгерістер енгізу туралы; Марапаттау комиссиясының құрамын қайта бекіту туралы; 2024-2025 оқу жылының қысқы қабылдау комиссиясының құрамын бекіту туралы; «Академиялық саясатты» бекіту туралы және т.б. мәселелер талқыланды.