Жаңалықтар

Бүгін университетімізде жылдағы дәстүр бойынша Түркия Республикасының негізін қалаушы, реформатор Мұстафа Кемал Ататүрікті еске алу шарасы өтті.

Жиын ректор өкілі м.а Нажи Генч пен әлеуметтік-мәдени даму вице-ректоры Еділ Төлегеновтің Мұстафа Кемал Ататүріктің ескерткішіне гүл қою рәсімімен бастау алды. Барша қатысушы Ататүріктің рухына тағзым етіп, еске алды. Ұлт көшбасшысы мен республика құру жолында жанын пида еткен барлық шейіттер құрметіне екі минуттық үнсіздік жарияланды. Қос мемлекеттің әнұраны шырқалды.

Іс-шарада сөз бастаған Түркияның Түркістандағы Бас консулы Илкер Пак:

«Бүгін біз ұлт көшбасшысы Мұстафа Кемал Ататүрікті еске алу үшін бір ортаға тоғыстық. Түркі әлемінің рухани астасы болған қасиетті Түркістандамыз. Бұл күндері түркі мемлекеттері білім мен ғылым, экономика, мәдениет пен өнер сынды көптеген алаңдарда ынтымақтастық орнатты. Бұл Ататүріктің алдына қойған мақсаттарының бірі еді. Сол кісінің ерен еңбегінің арқасында бүгін осы ортадамыз. Рухани байланысымыз нығая түсуі үшін бірлікте жұмыс істеуіміз керек»,- деді.

Келесі кезекте, ректор өкілі м.а Нажи Генч саяси қайраткер Мұстафа Кемал Ататүріктің өмірі мен Түркияның тарихында қалған өшпес ізі, ұлт жанашыры ретінде атқарған саяси қадамдары жайлы баяндады.

«Мұстафа Кемал Ататүрік Түркия Республикасының негізін қалаушы ғана емес, түркі мемлекеттерінің тәуелсіз ел болуын қалаған азамат еді. Ол түркі халықатарына егемендіктің қадір-қасиетін ұғындырды.

Түркі мемлекеттерінің бірігіп, тату-тәтті ғұмыр кешіп жатқанын көру үлкен қуаныш. Бүгінгі күн – Ататүріктің тәуелсіздік жолында атқарған ұлы істерінен кейін арман етіп, жас ұрпаққа аманат еткен күні. Оның мирасы мен тәуелсіз ақ таңымыздың қадіріне жетуіміз керек»,-деді.

Жиын соңында Мұстафа Кемал Ататүрік туралы бейнеролик көрсетіліп, Мағжан Арғынбай өлең шумақтарын оқыды.