Жаңалықтар

Университетіміздің ректоры Жанар Темірбекова Қазақ ұлттық қыздар педагогикалық университетінде «Ғылыми көшбасшылық және командалық басқару» тақырыбында ғылыми-академиялық семинар өтті. Іс-шараны Қазақстан Республикасы Президентінің жанындағы Қазақстан Республикасы Ұлттық ғылым академиясы ұйымдастырды.

Семинардың негізгі спикері болған Жанар Темірбекова ғылыми көшбасшылықтың маңызы, транзакциялық және трансформациялық көшбасшылық теориялары, тиімді ғылыми топ құрудың негізгі принциптері туралы айтты. 

Ректорымыз көшбасшылықтың толық спектрі туралы баяндама жасап, адамның көшбасшы болуына әсер ететін факторларды атады. Ғылыми топты дұрыс құру үшін рөлдерді бөлу, ресурстарды тиімді пайдалану және топ мүшелерінің қабілеттерін анықтау маңызды екенін атап өтті. Сонымен қатар, жұмысты жоспарлау, стратегиялық шешімдер қабылдау және ғылыми ұжыммен тиімді әрекет ету жолдары бойынша практикалық кеңестер ұсынды.

Семинарға 300-ден аса жас ғалым, ғылыми қызметкерлер, зерттеу топтары мен ғылыми жоба жетекшілері қатысты.  Семинар соңында қатысушылар спикерге сұрақ қойып, залда кері байланыс орнады.

Айта кетейік, бұл сапарында Жанар Темірбекова Қаныш Сәтбаевтың 125 жылдығына орай естелік төсбелгімен марапатталды.

Ал семинар ғылыми ортада көшбасшылық қасиеттерді дамытуға, заманауи басқару әдістерін меңгеруге және ғылыми-зерттеу топтарын тиімді басқаруға бағытталған ерекше шара болды.