Жаңалықтар

Түркі халықтарының мәдени мұрасын тоғыстырған қасиетті Түркістанға, оның ішінде халықаралық оқу орнымызға Түркияның Трабзон университетінің докторы, доцент Ахмет Түре арнайы келіп, студенттерге су бетінде бейнелеу техникасын үйретіп жүр.

Эбру – судағы өрнек, қайталанбас туынды. Бұл өнердің ерекшелігі – су бетіне бір рет салынған суретті дәл сондай етіп қайталау әсте мүмкін емес. Эбру өнері ғасырлар бойы түркі мәдениетінің ажырамас бөлігі болып, кітап безендіруден бастап, шығармашылықтың шыңына дейін жеткен.

Халықаралық академиялық ауысым бағдарламасымен келген Ахмет Түре бүгінде Спорт және өнер факультеті Бейнелеу өнері кафедрасының студенттеріне сабақ өтіп жатыр. Ол алдағы 4 айда білім алушыларға эбру өнерінің қыр-сырын үйретіп, көрме ұйымдастыруды жоспарлап отыр. Бұл көрме түркі халықтарының ортақ мұрасы мен мәдени сабақтастығын арттыра түспек.

Түркиялық оқытушы Қазақстанға алғаш рет келсе де, өзін жат сезінбейтінін айтады. «Бұл жер – біздің ата топырағымыз, Ахмет Ясауидің мекені. Түркі әлемінің рухани астанасына келу – мен үшін үлкен бақыт», – дейді ол.