Жаңалықтар

Жастардың конституциялық құқық саласындағы құзыреттерін арттыру заң мен тәртіпті нығайтуда шешуші рөл атқарады. Осы орайда, университетіміздің Өкілетті Кеңес Төрағасы Мұхиттин Шимшек пен ректор Жанар Темірбекова Конституциялық Соттың Төрағасы Эльвира Азимовамен кездесті.

Жиын барысында оқу ордамызда Заң факультетін қайта құру мәселесі талқыланды. Қаңтар айында кезектен тыс өткен №3 Сенат Мәжілісінде –  «Экономика, басқару және құқық» факультетінен Заң (Құқық) факультетін бөліп шығару жөнінде ұсыныс қаралған болатын.

Айта кетейік, Конституциялық Соттың Төрағасы Эльвира Азимова – Ясауи шаңырағын «Құқықтану» мамандығы бойынша тәмамдаған мақтанышымыз! Сондай-ақ, оқу ордамыздағы Түлектер қауымдастығының төрағасы. Осылайша, университеттің жанашырлары сүбелі сұхбат құрып, ғылым-білім жолындағы келешегі жөнінде ой қозғады.

Сонымен қатар, «заң және тәртіп» тұжырымдамасын ілгерілету мақсатында студенттер арасында құқық саласындағы икемді дағдыларды дамытуға үлес қосуға дайындығы жайлы сөз болды.  

Кездесу соңында білімгер жастар арасында азаматтарды құқықтық ағарту мен конституциялық құқық саласындағы білімді нығайту мәселелері бойынша бірлескен шаралар өткізу туралы Меморандумға қол қойылды.