Жаңалықтар

Бүгін ректор Жанар Темірбекова қазақ күресінен екі дүркін Әлем чемпионы атанған студентіміз Жұмажан Қожамбековті арнайы қабылдады. Университет ректоры еліміздің көк туын желбіреткен оқу ордамыздың спортшы саңлағын үлкен қошеметпен қарсы алды.

Жұмажан Қожамбеков ақпан айында Үндістанның Дели қаласында қазақ күресінен ересектер арасында өткен Әлем чемпионатында  алтын медальге ие болды. Ол 74 кг салмақ дәрежесінде Тәжікстандық спортшыны жеңіп, ел абыройын асқақтатты. 

Кездесу барысында ректор Жанар Темірбекова Жұмажанның әлем халқы көз тіккен додада оза шауып, чемпион атанауы оқу ордаға қуаныш сыйлағанын айтты. Мемлекет пен өзі білім алатын Ясауи университетінің атын асқақтатқаны үшін ризашылығын білдірді. Алдағы спорттық сайыстарына сәттілік тіледі. 

Жиын соңында Жұмажан Қожамбековті алтын медалімен құттықтап, университет атынан қаржылай сый-сияпат табыстады. Сонымен қатар, ұлтының мақтанышына айналған ұлды тәрбиелеген ата-анасын арнайы Алғыс Хатымен марапаттады. Ректор Жанар Темірбекова Жұмажанға өз атынан ата-анасына деген риясыз көңілі мен алғысын жеткізуді тапсырды.