Жаңалықтар

2025 жылдың 13 мамырында Қожа Ахмет Ясауи атындағы Халықаралық қазақ-түрік университетінде ISO 9001:2015 халықаралық сапа менеджменті стандартына сәйкестікті растауға арналған сыртқы сертификаттық аудиттің ашылуына байланысты баспасөз брифингі өтті.

Аудиттің мақсаты — университеттің сапа менеджменті жүйесінің тиімділігі мен жетілу деңгейін бағалау, ISO 9001:2015 стандарты талаптарына сәйкестігін растау, сондай-ақ тұрақты даму бағытындағы жетілдіру аймақтарын анықтау. Аудит барысында қолданыстағы сапа сертификатын жаңарту жоспарланған.

Ашылу жиналысына университет ректоры Ж.Темірбекова, ректор өкілі Нажи Генч, ғылым және стратегиялық даму жөніндегі вице-ректор А.Ошибаева, академиялық мәселелер жөніндегі вице-ректор Э.Идрисова, әлеуметтік-мәдени даму жөніндегі вице-ректор Е.Төлегенов, құрылымдық бөлім басшылары, департамент және ҒЗИ директорлары, факультет декандары мен кафедра меңгерушілері қатысты.

Университет ректоры Анкара қаласынан келген Түрік стандарттар институтының (TSE) өкілдері — бас аудитор мырза Решит Языджыоғлу мен д-р Зюльфие Дағлыны ресми түрде таныстырып, олардың сапар мақсатына тоқталды.

Өз сөзінде мырза Решит Языджыоғлу алдағы төрт күн бойы университеттің академиялық, әкімшілік және көмекші құрылымдарының қызметін кешенді түрде талдау жоспарланғанын атап өтті. Аудит барысында сапа мәдениеті, сапа саясаты мен мақсаттары, тәуекелдер мен мүмкіндіктерді басқару, түзетуші іс-шаралар және жетілдіру бағытындағы жұмыстар егжей-тегжейлі қаралады.

Сондай-ақ ол университеттің соңғы жылдары даму қарқынының оң бағытта екенін атап өтіп, жүргізілетін аудит нәтижелері білім ордасының халықаралық аренадағы орны мен беделін нығайтуға ықпал етеді деген сенім білдірді.