Жаңалықтар

«Бұл жоба – тек бір университеттің жобасы емес, әлемдегі 10 жетекші жоғары оқу орнының ғалымдары бірлесіп жасаған еңбек. Оның ішінде біздің елімізден өзіміздің Қожа Ахмет Ясауи атындағы Халықаралық қазақ-түрік университеті мен М.Әуезов атындағы Оңтүстік Қазақстан университеті бар. Жобаның басты мақсаты – суды тиімді басқару мәселелерін оқу үрдісіне енгізу, ғылыми зерттеу бағыттарын кеңейту», – деді университетіміздегі жоба үйлестірушісі Ғани Исаев.

Жобаның университетішілік үйлестірушілері - техника ғылымдарының кандидаты, профессор м.а. Ғани Исаев пен техника ғылымдарының кандидаты, профессор м.а. Индира Аймбетова. Олардың айтуынша, аталған ғылыми бастама аясында «Биологиялық және сабақтастық ғылымдар»білім беру бағдарламасына қалдық суларды биологиялық жолмен тазалауға арналған екі жаңа пән енгізілген. Жобаның негізгі мақсаты –су ресурстарын биологиялық жолмен тиімді пайдалану, қалдық суларды тазалау технологиясын жасау, оны оқу бағдарламаларына енгізу және ғылыми-зерттеу жұмыстарын жетілдіру.

Жоба жоғары оқу орындары арасындағы ғылыми-инновациялық ынтымақтастықты дамытуға, қоршаған ортаны қорғау саласындағы білім сапасын арттыруға, сондай-ақ халықаралық деңгейде тәжірибе алмасуға үлкен мүмкіндік береді.