Жаңалықтар

Бүгін Ахмет Ясауи атындағы Халықаралық қазақ-түрік университетінің ректор өкілі м.а. Нажи Генч пен Түркияда орналасқан Сулейман Демирел Университетінің ректоры Мехмет Салтан екіжақты ынтымақтастық меморандумына қол қойды.

Құжаттың басты мақсаты – екі оқу орны арасындағы академиялық және мәдени байланыстарды дамыту, білім беру мен ғылым саласында ортақ жобаларды жүзеге асыру. Меморандум аясында профессор-оқытушылар құрамы мен студенттер алмасуы, бірлескен ғылыми-зерттеу жұмыстары, халықаралық конференциялар мен семинарлар өткізу жоспарланған.

Нажи Генч өз сөзінде бұл ынтымақтастық екі университет арасындағы достық пен өзара қолдаудың жаңа кезеңін бастап беретінін атап өтті:

«Бұл құжат – білім мен ғылым саласында ортақ бастамаларды жүзеге асыруға үлкен мүмкіндік. Біз тәжірибе алмасу арқылы студенттеріміздің халықаралық деңгейде білім алуына және зерттеу жүргізуіне жол ашамыз», – деді ол.

Сулейман Демирел Университеті – Түркиядағы жетекші жоғары оқу орындарының бірі. Ыспарта қаласында орналасқан университет инженерия, медицина, әлеуметтік ғылымдар және өнер саласында жоғары білікті мамандар даярлайды.

Меморандумның жүзеге асуы екіжақты серіктестікті нығайтып қана қоймай, жастардың білім көкжиегін кеңейтіп, мәдени диалогты дамытуға ықпал етпек.