Жаңалықтар

Университетіміздің ректоры Жанар Темірбекова Әзірбайжан астанасы Бакуде Түркі мәдениеті және мұрасы қорының штаб-пәтерінде ұйым президенті Ақтоты Райымқұловамен кездесті.

Кездесудің басты мақсаты — жоғары білім беру және ғылыми-гуманитарлық саладағы ынтымақтастықты кеңейтуге бағытталған бірлескен бастамаларды талқылау.

Басқосуда  білім беру дәстүрлері негізінде қалыптасатын жас түрколог мамандарды даярлау және олардың кәсіби дамуын қолдау мәселелері талқыланды.

Тараптар түркі әлемінің ортақ тарихи-мәдени мұрасын ғылыми тұрғыда зерттеу, осы саладағы кадрлық әлеуетті нығайту және академиялық алмасу бағдарламаларының маңызы жөнінде пікір алмасты.

Жиын барысында студенттер мен жас зерттеушілерге арналған бірлескен білім беру және тағылымдама бағдарламаларын ұйымдастыру, ғылыми семинарлар мен жазғы мектептер өткізу, сондай-ақ ортақ жобаларды іске асыру арқылы түркологиялық зерттеулерді дамыту мүмкіндіктері кеңінен қарастырылды.

Кездесу соңында тараптар өзара қызығушылық тудыратын бағыттар бойынша ынтымақтастықты одан әрі тереңдетудің маңызын атап өтіп, институционалдық өзара іс-қимылды жалғастыруға дайын екенін жеткізді.