Жаңалықтар

Бүгін университетімізде «AI STARTUP HUB» инновациялық офисінің салтанатты ашылу рәсімі өтті.

Іс-шара Мемлекет басшысы Қасым-Жомарт Тоқаевтың 2026 жылды – Цифрландыру және жасанды интеллект жылы деп жариялау бойынша бастамасы аясында іске асты.

AI STARTUP HUB инновациялық офисі – университетте цифрландыру, жасанды интеллект негізіндегі жобаларды әзірлеу, инновациялық кәсіпкерлік экожүйесін дамыту және стартаптарды қолдауға бағытталған орталық. 

Сонымен қатар, бұл алаң болашақта жас өнертапқыштар мен бастамашыл жастардың жобаларын жетілдіруге, оларды тәжірибеде іске асыруға және инновациялық идеяларды жаңа деңгейге көтеруге серпін береді.

Маңызды шараға Түркістан облысының прокуроры Мұрат Тлеубердиев, Түркістан облысы Полиция департаментінің басшысы Арыстанғани Заппаров, Түркістан облысы Экономикалық тергеп-тексеру департаментінің басшысы Ерболат Балғабаев, ҚР Бас прокуратурасы жанындағы Құқықтық статистика және арнайы есепке алу жөніндегі комитеттің Түркістан облысы бойынша департаменті басшысының орынбасары Аян Акбердиев, Түркістан облысы Білім басқармасының басшысы Ғалымжан Орынов, университет ректоры Жанар Темірбекова, ректор өкілі м.а. Нажи Генч және өзге де жауапты тұлғалар қатысты.

Салтанатты жиын барысында қонақтар университеттің бас ғимаратында ашылған AI STARTUP HUB инновациялық офисінің лентасын қиды. Ашылу рәсімінен кейін қатысушылар орталық жұмысымен танысып, арнайы  жобаларды тамашалады. 

Айта кетейік, қазіргі таңда 25-ке жуық жоба дайындалуда. Бұл бастамалар цифрлық шешімдерді дамытуға, жасанды интеллект технологияларын тиімді пайдалануға және университеттің инновациялық әлеуетін арттыруға бағытталған.

Жаңа орталықтың ашылуы – оқу ордамыздың ғылым, технология және кәсіпкерлік бағыттарын өзара ұштастыра отырып, заманауи стартап мәдениетін қалыптастыру жолындағы маңызды қадамдардың бірі. Мұнда студенттер мен жас ғалымдардың тың идеяларын қолдауға, оларды нақты жобаларға айналдыруға және тәжірибелік тұрғыда дамытуға қолайлы мүмкіндік қарастырылған.