Жаңалықтар

Университетімізде өтіп жатқан Түркі әлемінің бірінші Халықаралық география конгресінің секциялық отырыстары өтті.

Айтулы конгресс 6 секция бойынша жұмыс істеді: Түркі тілдес мемлекеттер мен елдердегі географиялық білім беру мен зерттеулердің мәселелері; Түркі тілдес елдер географиясын оқытудың теориялық және практикалық маңызы; Түркі тілдес географиялық ұғымдар мен терминдердің әдістемелік негіздері; Түркі тілдес мемлекеттердегі табиғат ресурстарының әлеуеті, шаруашылықта тиімді пайдаланудың инновациялық технологиялары мен әдістері; Түркі тілдес мемлекеттер мен елдердегі табиғи қорықтар мен рекреациялық аймақтардың жағдайы және халықаралық туризмнің даму әлеуеті; Түркі тілдес мемлекеттерде су ресурстарын және қауіпті табиғи процестерді басқару.

Әр секция тақырыптарына сай бағыттарына сәйкес өзекті мәселелерді қозғап, қатысушылар өзара тың ақпараттармен алмасты.

Географияны тұрақты даму үшін оқытудың инновациялық әдістері: келешегі мен міндеттер, Экономикалық географияны оқытудың жаңа тәсілдері: сандық ресурстар және практикалық құзыреттер, Түркітілдес елдердегі географиялық білім және тұрақты даму, Қазақстанның тұзды топырақтарын геокеңістіктік модельдеу, Экологиялық туризмді аумақтық ұйымдастыру арқылы Қазақстанның ұлттық парктерінің тұрақты дамуын қамтамасыз ету, Түркі тілдес мемлекеттерде су ресурстарындағы мәселелер сынды т.б маңызды тақырыптар бойынша ғалымдар баяндама жасады.

Конгреске қатысушылар мен қонақтар секциялық отырыстардан соң, «Ясауи жолы» спектаклін тамашалады. Көптің қошеметіне бөленіп,  ерекше ықыласына ие болған бұл қойылым оқу ордамызда қайта қойылды. Спектакльдің  актерлік құрамы – Актерлік өнер мамандығының 3-курс студенттері.  Ал, қоюшы режиссері – ҚР Мәдениет саласының үздігі Мақсат Айтжанов. Түркі елдерінен келген ғалымдар мен өзге де қонақтар Қожа Ахмет Ясауидің өмірі мен еңбектері, армандары мен шәкірт тәрбиелеудегі ұстаздық бейнесімен тереңінен танысты.