Жаңалықтар

Бүгін университетімізде Жаратылыстану ғылымдары факультетінің түлектерінің кездесуі өтті.

«Біздің түлек – біздің мақтанышымыз» тақырыбында өткен басқосуға әлеуметтік-мәдени даму вице-ректоры Асқар Тұрғанбаев, Жаратылыстану ғылымдары факультетінің деканы Жанібек Исабеков, Түлектер қауымдастығысының төрағасы Мариям Асанова, сонымен қатар факультеттің ОҚП құрамы,түлектері мен студенттері қатысты.

Жиында сөз бастаған әлеуметтік-мәдени даму вице-ректоры Асқар Тұрғанбаев жаратылыстану ғылымдарының еліміздің өсіп-өркендеуі жолында үлкен маңызға ие екендігін атап өтті. Университетімізден түлеп ұшқан түлектердің республиканың түкпір-түкпірінде ерен еңбек етіп, оқу орнымыздың атын танытып жүргенін, сондай-ақ жаратылыстану факультетінің оқу ордамыз құрылған жылдан бері бетке ұстар факультеттердің бірі әрі бірегейі екендігін айтты.

Шараға математика кафедрасының 2015 жылғы түлегі, Кентау қаласы мамандандырылған дарын мектеп-интернатының педагогі Жанасыл Исаев, математика кафедрасының 2016 жылғы түлегі,Нұртас Оңдасынов атындағы Түркістан мамандандырылған мектеп-интернатында педагог-зерттеуші Шукур Алимханов, ғылыми биология кафедрасының 2010 жылғы түлегі, облыстық перинаталдық орталығының зертхана бөлімінің зертхана дәрігері Лаура Кенжегараева,Хамза орта мектебінде химия пәнінің мұғалімі Қалмұрат Ражабетов, Сауран аудандық мәслихатының аппаратының басшысы Мақсат Сейітханов, Ақ Орда мектебінің директоры Медет Тәжібаев арнайы келді.

Басқосу соңында студенттер аға буынға өздерін қызықтырған сұрақтарына қойды.