Жаңалықтар

Бүгін Экономика және басқару факультетінде Анкара Хаджы Байрам Вели университетінің оқытушысы, доктор Месут Аслан «Халықаралық қауіпсіздік саласындағы жасанды интеллект пен машиналық оқыту» атты семинар өтті.

Жиында сөз бастаған Месут Аслан: «Құрметті оқытушылар мен студенттер! Құшақ жая қарсы алғандарыңыз үшін алғыс білдіремін. Қазақстанды ерекше ұнаттым. Ал, бүгін өздеріңізге жасанды интеллект пен халықаралық қауіпсіздік алаңындағы оның орны туралы кеңінен ақпарат беремін деп ойлаймын»,-деді.

Спикер, ең алдымен, қатысушыларға жасанды интеллекттің не екенін түсіндірді. Әсіресе, жасанды интеллектің қалай пайда болғаны мен қалай жұмыс істейтіні жайлы тың ақпаратпен бөлісті. Қазіргі таңда адамдар арасында қалыптасқан «Жасанды интеллекттің – өзіндік санасы бар. Өзі ойлап, сұрақтарға жауап береді. Адам сияқты көрінеді» деген қате пікірлерді талқылады. Жасанды интеллект – адамдар ойлап шығарған арнайы бағдарлама екенін айтты. Күнделікті қолданатын бағдарламаларға қарағанда жүйесі тым терең, әрі күрделі болуымен ғана ерекшеленетінін жеткізді. Қатысушыларға мысалдар арқылы түсіндіріп, өзекті ойын ортаға салды.

Сондай-ақ, семинар барысында жасанды интеллекттің соғыс алаңдарындағы рөлі және оған байланысты тәуекелдер жан-жақты талқыланды. Аталған технологияның көріністерді адамға тән түсінікпен емес, деректер жиынтығы ретінде өңдейтіні, сондай-ақ оның мақсатты жарнамадан бастап, әскери операцияларға дейінгі эволюциясы сараланды. 

Доктор Месут Аслан сараптамалық деректерге сәйкес, заманауи әскери жүйелер нысаналарды анықтау жылдамдығын сағатына 1000 деңгейіне дейін жеткізіп, әрбір нысанды адам тарапынан тексеру уақытын 3,6 секундқа дейін қысқартқанын атады. Бұл үрдіс әскери қызметкерлердің рөлін қайта қарастырып, оларды машиналық шешімдерді бекітуші пассивті буынға айналдыру қаупін арттыратынын жеткізді.

Сонымен қатар, автоматтандырудың ықтимал салдары ретінде жаңартылмаған деректер негізінде азаматтық нысандардың қате сәйкестендірілуі сияқты тәуекелдерін түсіндірді. 

Жиын соңында қатысушылар спикерге жасанды интеллект пен халықаралық қауіпсіздік алаңында сұрақтарын қойып, пікірлерін білдірді.