Жаңалықтар

Университетте «Таза Қазақстан» акциясы аясында «Табиғат фактурасы» атты студенттердің шығармашылық байқауы өтті. Шара Өнер, медиа және дизайн факультетінің Журналистика және Бейнелеу өнері кафедраларының бірлесіп ұйымдастыруымен жүзеге асты. Ботаникалық бақ ғылыми-зерттеу институты қолдау көрсетті.

Байқаудың мақсаты – «Таза Қазақстан» тұжырымдамасын насихаттау, қоршаған ортаны қорғау мәдениетін қалыптастыру және студенттердің шығармашылық қабілеттерін дамыту. Сондай-ақ, студенттер арасындағы достық қарым-қатынасты нығайту.

Өнер, медиа және дизайн факультетінің деканы Дархан Елжанов шараның ашылуында сөз сөйлеп, бұл бастаманың маңызына тоқталды. Оның айтуынша, күзде бастау алған игі дәстүр өз жалғасын тауып келеді және алдағы уақытта табиғаттың төрт мезгілінде де осындай шаралар ұйымдастыру жоспарлануда.

Ал Еуразия ұлттық университетінің өкілі Қайрат Сақ екі жоғары оқу орны арасындағы ынтымақтастықты нығайту туралы атап өтті. Ол студенттердің бірлескен жобаларын жүзеге асыру, соның ішінде екі қала өмірін қамтитын арнайы газет айдарына мақалалар жариялау  идеясын ұсынды.

Сонымен қатар, Ботаникалық бақтың директоры Бекзат Мырзабеков қатысушыларға ізгі тілектерін білдірсе, Журналистика кафедрасының меңгерушісі Балзия Баешова студенттерге сәттілік тіледі.

Байқауға қатысқан студенттердің ғылыми жетекшілері қатарында Журналистика кафедрасының оқытушысы Ғалымжан Тәжібек пен Бейнелеу өнері кафедрасының оқытушысы Рысымбет Ержан болды.

Шараның ерекшелігі – пәнаралық форматта ұйымдастырылуы. Журналистика мамандығының студенттері түсірген фотосуреттер негізінде Бейнелеу өнері мамандығының студенттері майлы бояумен табиғи көркем туындылар салды. Осы жұмыстардың үйлесімі арқылы үздік шығармалар анықталды.

Қатысушылар табиғат элементтерін пайдалана отырып, ерекше әрі мазмұнды туындылар ұсынды. Қонақтар көрмеге қойылған жұмыстарды тамашалап, әр туындының идеясы және мазмұнымен танысты. Әсіресе, фотосуреттер және майлы бояумен салынған картиналардың бір-біріне ұқсастығы көрермендерді таңғалдырды.

Әрбір қатысушы өз жұмысында табиғаттың әсемдігін түрлі түстер арқылы жеткізе білді. Шығармашылық туындыларды оқытушылар, профессорлар, студенттер мен қызметкерлер жоғары бағалады.

Байқау қорытындысы бойынша жеңімпаздар мен олардың жетекшілеріне алғыс хаттар мен арнайы сыйлықтар табысталды.

Сонымен қатар, шара аясында арнайы дефиле көрсетілімі де ұйымдастырылды.

Осылайша, «Табиғат фактурасы» өнер байқауы жоғары деңгейде өтіп, студенттердің экологиялық сана-сезімін арттыруға, табиғатты аялаудың маңызын терең түсінуге зор үлес қосты.