Жаңалықтар

Ректор Жанар Темірбекова Өзбекстан Республикасына жұмыс сапарымен барып, Хиуа қаласында өткен ТҮРКСОЙ-ға мүше елдердің мемлекеттік хореографиялық жоғары оқу орындары ректорлары мен басшыларының III халықаралық отырысына қатысты.

Айтулы жиын «Түркі әлемінің дәстүрлі халық билері антологиясы» тақырыбы аясында «Лазги» III халықаралық би фестивалі шеңберінде ұйымдастырылды.

Халықаралық басқосуға Әзербайжан, Қазақстан, Қырғызстан, Өзбекстан және Түрікменстан елдерінің жетекші университеттерінен арнайы өкілдер қатысты. Спикерлер өз елдеріндегі дәстүрлі халық билерін зерттеу мен дамыту бағытындағы жұмыстарын кеңінен таныстырды.

Осы тұста, ректор Жанар Темірбекова конференция қатысушыларына арналған құттықтау сөзінде университеттің миссиясы аясында жүзеге асырылып жатқан жұмыстарға тоқталып, жаңадан құрылған Өнер, медиа және дизайн факультетінің қызметін таныстырды. Сонымен қатар, «Би-сұлтан» би ансамблінің жетістіктері мен шығармашылық бағыттағы табыстары кеңінен баяндады.

Айта кетерлігі, сапар барысында ректор түркі мемлекеттерінің жетекші хореографиялық ұйымдарымен өзара ынтымақтастық орнату бойынша келіссөздер жүргізді. Алдағы уақытта аталған ұйымдардың өкілдері университетке арнайы сапармен келуі жоспарланып отыр. Сондай-ақ, бауырлас елдердің іргелі жоғары оқу орындарымен академиялық ұтқырлық бағдарламаларын жүзеге асыру мәселелері талқыланды.

Жиын барысында «Түркі әлемінің дәстүрлі халық билері антологиясы» атты алты томдық іргелі еңбектің құрылымы талқыланып, ғылыми-әдістемелік негіздері анықталды.

Сондай-ақ, халықаралық ғылыми-редакциялық кеңес құру, университеттер арасындағы ынтымақтастықты дамыту, бірлескен ғылыми зерттеулер жүргізу, академиялық ұтқырлықты арттыру және халықаралық конференциялар мен фестивальдер ұйымдастыру мәселелері қарастырылды.

Кездесу қорытындысы бойынша қатысушылар дәстүрлі халық билерін сақтау, жүйелеу және насихаттау бағытындағы жұмысты күшейту, антология материалдарын білім беру бағдарламаларына енгізу және мәдени мұраны кеңінен дәріптеу жөнінде маңызды шешімдер қабылдады.