Жаңалықтар

Оқу ордамыздың Бейнелеу өнері кафедрасының аға оқытушысы, «Мәдениет саласының үздігі» медалінің иегері Мереке Айдарша Түркістан облыстық қоғамдық кеңесінің XIV кеңейтілген отырысында Түркі мемлекеттері ұйымы ұйымдастырған бейресми саммитті жоғары деңгейде өткізуге қосқан үлесі үшін ҚР Президенті Қасым-Жомарт Тоқаевтың Алғыс хатымен марапатталды.

Айта кетейік, Мереке Айдарша саммит аясында ұйымдастырылған Қолөнер орталығында өзінің жеке көрмесін ұсынып, түркі халықтарының дәстүрлі қолөнері мен ұлттық құндылықтарын шетелдік қонақтарға кеңінен таныстырды.  

Көрмеде автор ұлттық нақыштағы туындылары мен қолөнер бұйымдарын көпшілік назарына ұсынды.

Түркістан облысының әкімі Нұралхан Көшеров Мереке Айдаршаға марапатты арнайы табыстады. Бұл марапат – ұстаздың мәдениет пен өнер саласындағы ұзақ жылғы еңбегі мен ұлттық қолөнерді насихаттауға қосқан зор үлесінің нәтижесі. 

Осылайша, облыс әкімі Түркі мемлекеттері ұйымының бейресми саммитін жоғары деңгейде ұйымдастыруға және өткізуге үлес қосқан өзге де азаматтарға Мемлекет басшысының ыстық ықыласын жеткізіп, мемлекеттік наградалар мен Алғыс хаттарды ұсынды. 

Марапат иесін шын жүректен құттықтап, шығармашылық табыс пен толағай жетістіктер тілейміз!