Жаңалықтар

Оқу ордамызда Түркия Республикасы, Кырыккале университетінің Спорт ғылымдары факультетінің оқытушысы, профессор, доктор Пелин Аксен «Инклюзивті спорт тәжірибелері: Еуропалық тәжірибеден Қазақстан үшін қорытындылар» тақырыбында семинар өтті.  

Іс-шараға Спорт факультетінің оқытушы-профессорлар құрамы мен студенттері қатысты.

Жиын  модераторы – Спорт факультетінің деканы, PhD Бағлан Ермаханов болды.

Семинар барысында Еуропадағы инклюзивті спорт пен білім беру тәжірибелері таныстырылып, оларды Қазақстанда қолдану мүмкіндіктері талқыланды. Мүгедектігі бар адамдардың дене белсенділігі мен спортқа қатысуын арттыру, жаттықтырушылар мен педагогтерді даярлау, сондай-ақ инклюзивті спортты дамытуға бағытталған пилоттық бастамаларды жүзеге асыру мәселелері сөз болды.  

Пелин Аксен аталған халықаралық тәжірибені Қазақстанның мәдени ерекшеліктері мен білім беру жүйесі, спорттық дәстүрлеріне сәйкес бейімдеп, ел жағдайына сай өзіндік модель ретінде қалыптастырудың маңызын атап өтті.  

Сонымен қатар, футбол, баскетбол, волейболмен қатар асық ату, тоғызқұмалақ және қазақ күресі сияқты ұлттық спорт түрлерін де инклюзивті форматта дамытуға болатынын айтып, нақты мысалдар ұсынды.  

Жиын соңында қатысушылар Қазақстан мен Түркия университеттері арасында инклюзивті спорт және білім беру саласында бірлескен жобалар, ғылыми зерттеулер мен пилоттық бағдарламаларды дамыту жөнінде пікір алмасты. Сондай-ақ, болашақта бұл ынтымақтастықты Түркі әлемінде кеңейту мүмкіндіктерін қарастырды.