ОКСФОРД УНИВЕРСИТЕТІНІҢ СТУДЕНТТЕРІ УНИВЕРСИТЕТІМІЗГЕ ЭКСКУРСИЯ ЖАСАДЫ

«Қазақ тілін үйрету бағдарламасы» аясында Оксфорд университетінен келген студенттер оқу ордамызға экскурсия жасады.

Ең алдымен олар ректор өкілі Пейами Батталмен кездесті. Ректор өкілі шетелдік студенттермен әңгімелесіп, Түркістан қаласы туралы пікірлерін сұрады. Сондай-ақ, студенттерге сәттілік тілеп, арнайы естелік сыйлықтар табыс етті.

Кездесуден кейін қонақтар Мәдениет орталығында орналасқан музейге барып, Түркі әлемінің тарихы мен рухани мұрасы туралы мәлімет алып, музейдегі тарихи жәдігерлерді қызыға тамашалады.

Оксфорд студенттері Өнер, медиа және дизайн факультетіне де барды. Экскурсия барысында олар факультеттегі шеберханалардың жұмыс барысын көрді. Атап айтқанда, тоқыма бұйымдарын жасау, киіз бен текемет басу, шиден кілемше тоқу, сурет салу сияқты шығармашылық жұмыстармен танысты.

Бағдарлама қатысушылары қазақ тілін меңгерумен қатар, университеттің мәдени-шығармашылық кеңістігімен танысып, Қазақстанның тарихы, өнері мен дәстүрі туралы білімдерін толықтырды.