Жаңалықтар

Бүгін оқу ордамызда ҚР Ұлттық ғылым академиясының академигі, ардақты ұстаз Серік Пралиевтің тау тұлғасына арналған – «Сана биігіне самғау» атты деректі фильмінің көрсетілімі өтті.

Студенттер мен оқытушы-профессорлар көрсетілімді тамашалау үшін былтыр оқу ордамызда ашылған Серік Пралиев атындағы конференция залында жиналды. 

Серік Пралиев – педагогика ғылымдарының докторы, профессор, университетімізде 2003-2007 жылдары ректор қызметін атқарған ұлағатты ұстаз.

Іс-шараның негізгі мақсаты – ұстаздың ғибратты ғұмыры мен қайраткерлік қызметін өскелең ұрпаққа насихаттау мен ардақты есімін есте сақтау.

Жиында алғы сөзді алған Әлеуметтік-даму вице-ректоры Еділ Төлегенов:

«Әрбір адам қоғамда белгілі бір дәрежеде өзінің ізін қалдырады. Сондай нар тұлғалардың бірі – Серік Жайлауұлы. Ол университетті басқарып қана қоймай, негізін қалауға және өркендеуіне үлес қосқан болатын. Ағамыз өмірден өткенімен, артында өшпес ізі қалды. 

Ардақты ұстаздарымызды ұмытпай, еңбектерін келер ұрпаққа жеткізудің маңызы зор. Осындай іс-шаралардың студент жастарға берері мол деп білеміз. Сондықтан, бүгінгі жиынды ұйымдастырушыларға алғыс білдіреміз!»,-деді.

Келесі кезекте, «Сана биігіне самғау» деректі фильмі көрсетілді. Толық метражды деректі фильмде Серік Жайлауұлының өнегелі өмірі мен қарымды қызметі жан-жақты бейнеленген.

Ал, оқу ордамыздың ардагер ұстаздары Сейдулла Садықов пен Гүлсара Тоққұлова Серік Пралиев жайлы естеліктерімен бөлісті. Оның басшылық қызметтегі және ұстаз рөліндегі болмысын баяндап, еңбектерін атады. 

Осылайша рухани кеште студенттер Серік Пралиевтің өмір жолы мен білім-ғылым саласының дамуына қосқан үлесі жайлы тың ақпараттар алды.