БІЗДІҢ ТҮЛЕК – БІЗДІҢ МАҚТАНЫШЫМЫЗ!

УНИВЕРСИТЕТ ТҮЛЕГІ МЕМЛЕКЕТ БАСШЫНЫҢ ҚОЛЫНАН МАРАПАТ АЛДЫ

Оқу орнымыздың Спорт және өнер факультетінің түлегі, самбодан Қазақстан және Азия чемпионы Айнұр Ақжігітова UAE SWAT Challenge додасында Әлем чемпионы атанып, Президентіміз Қасым-Жомарт Тоқаевтың қолынан «Жауынгерлік ерлігі үшін» төсбелгісімен марапатталды. 

Еске салайық, жуырда Дубайда жоғарғы әскери спортшылар арасында UAE SWAT Challenge сайысы өтті. Оған Қазақстан атынан 12 команда қатысты. Соның ішінде, Ішкі істер министрлігінің «Сұңқар» және «Томирис» командалары халықаралық жарыстың күміс жүлдегері атанды. Ал Ұлттық қауіпсіздік комитетінің «Арыстан» командасы төртінші орынға ие болды. Мемлекеттік күзет қызметі мен Қорғаныс министрлігінің командалары да шеберліктің үздік үлгісін көрсетті. Мемлекет басшысы жеңімпаздарды құттықтап, бұл табыс тиянақты дайындық пен қажырлы еңбектің нәтижесі екенін атап өтті.

Еліміздің намысын абыроймен қорғаған жауынгерлер қатарында университетіміздің түлегі, белді самбошы ару Айнұр Ақжігітова да болды. Чемпионның бапкері - ҚР еңбек сіңірген жаттықтырушысы, самбодан 5 дүркін Әлем чемпионы, ардагер самбошы және оқу орнымыздың ардагер оқытушысы Әбдісадық Халилаев. 

Университетіміздің түлегі – Айнұр Ақжігітованы және жеке бапкері Әбдісадық Халилаевты қуанышымен құттықтай отырып, алдағы жоспарларына сәттілік тілейміз!