Жаңалықтар

Университетімізге Қазақстанның еңбек сіңірген қайраткерлері, М.Әуезов атындағы Қазақ ұлттық драма театрының актерлері Азат Сейтметов пен Данагүл Темірсұлтанова арнайы қонақ ретінде келді. Олар «Спорт және өнер» факультетінің студенттерімен кездесу өткізді.

Жиын модераторы – Әлеуметтік-мәдени даму вице-ректоры Еділ Төлегенов болды.

Кездесуде сөз бастаған Азат Сейтметов: «Өнер – кез-келген елді, оның мәдениеті мен болмысын танытатын ерекше сала. Өнер жолында біреуге ақыл айту қиын дүние. Ең бастысы – адам өзі таңдаған мамандығын шын жүрегімен сүюі керек деп ойлаймын»,-деді. 

Данагүл Темірсұлтанова: «Бүгін сіздермен кездесуге келгеніме қуаныштымын! Бұл университетке аяқ басқаннан ерекше толқыдым. Себебі, атам, Райымбек Сейтметов осы оқу ордада «Өнер» факультетін құрып, шәкірттер тәрбиелеген еді.

Заманды жасайтын адамдар. Ал, қазіргі таңда тек өнер жолындағы мамандар ғана емес, қандай мамандық иесі болса да істің оңайы жоқ. Әр істің үлкен жауапкершілігі бар. Актер болу да жауапкершілікті талап етеді. Адам мамандығын ессіз сүйсе, сол мамандық өзі көтеріп, биікке шығарады. Осыны ұмытпау керек»,-деді.

Қос актер театр өнерінің қасиеті мен әртіске берер тәлімі, практикалық тәжірибесі мен мол мұрасы жайлы тереңінен баяндады. Студенттік шақтары мен жас актер ретінде алғаш сахнаға шыққан сәттерін толғаныспен еске алды.

Жиында университетімізде «Өнер» факультетінің негізін қалаған, ҚР халық артисі, театр режиссері Райымбек Сейтметовтың ерен еңбегі мен шәкірт тәрбиелеудегі ұстаздық болмысы кеңінен айтылды. 

Кездесу соңында студенттер өздерін қызықтырған сауалдарын қойды. Әртістердің қызығы мен қиындығы мол өнер жолы туралы естеліктерін тыңдады.

Айта кетейік, Азат Сейтметов пен Данагүл Темірсұлтанова алдағы уақытта оқу ордамызда арнайы шеберлік сағаттарын өтуге келісті.