Жаңалықтар

Университетімізде өткен «Түркі әлемі: Сайлау жүйелерінің дәстүрі, тәжірибесі және даму болашағы» атты халықаралық ғылыми-тәжірибелік конференциясы аясында – ТМҰ мүше мемлекеттердің орталық сайлау органдарының  консультативтік платформасының аллеясы ашылды.

Іс-шараға ТМҰ мүше мемлекеттер – Әзербайжан, Қазақстан, Қырғызстан, Түркия, Өзбекстан және ТМҰ бақылаушы мемлекет – Мажарстанның орталық сайлау органдарының, сондай-ақ 4 беделді халықаралық ұйым – ТМҰ, Сайлау органдарының дүниежүзілік қауымдастығы (A-WEB), Түркі мемлекеттерінің Парламенттік Ассамблеясы (ТүркПА), Түркі академиясының басшылары мен өкілдері, сондай-ақ ТМҰ елдерінің ғалымдары, ҚР Парламентінің депутаттары, ҚР Орталық сайлау комиссиясы жанындағы Сараптамалық кеңестің мүшелері, облыстық, Астана, Алматы және Шымкент қалаларының аумақтық сайлау комиссияларының төрағалары қатысты.

Айтулы басқосуда ағаш егу ісі түркі мемлекеттерінің өзара ынтымақтастығы мен тамыры тереңдеген татулығын бекіте түскендей. Жиналған қауым киелі Түркістан жерінде, күллі түркі жұртының бабасы болған Қожа Ахмет Ясауи атындағы оқу орда топырағында ағаш егіп, игі іс жасады. Әрі рухани астанада қалдырған естеліктері болды. Қонақтар, болашақта жас шыбық қатайып, мәуелі бәйтерекке айнала түскеніндей, ұлттар татулығы да жайқалып, көктей берсін деген игі тілектерін жеткізді.

Айта кетейік, жаңа аллеяға ағаш еккендер қатарында: Қазақстан Республикасы Орталық сайлау комиссиясының Төрағасы Нұрлан Әбдіров, Түркі Мемлекеттері ұйымының Бас хатшысы Кубанычбек  Омуралиев, Әзірбайжан Республикасы Орталық сайлау комиссиясының Төрағасы Мазахир Панахов, Қырғыз Республикасының сайлау және референдум өткізу жөніндегі Орталық комиссиясының Төрағасы Тынчтык  Шайназаров, Түрік Республикасын Жоғары сайлау кеңесінің Төрағасы Ахмет Йенер, Өзбекстан Республикасы Орталық сайлау комиссиясының Төрағасы Зайниддин Низамходжаев және өзге де мемлекет және қоғам қайраткерлері бар.