Жаңалықтар

Оқу ордамызға «Ана жұрттан - Ата жұртқа» атты денсаулық көпірі жобасы аясында Түркия Республикасы Жеррахпаша университетінің пластикалық және рекоструктивті хирургі Алп Ержан келді. Ол университетіміздің Клиника-диагностикалық орталығында 4 күндік шеберлік сағатын өткізді. Белгілі хирург пен клиникамыздың хирург маманы Түркістан облысы бойынша алғаш рет – «Нерв трансплантациясы»  отасын жасады.

Айта кетейік, клиникамызға «Ана жұрттан - Ата жұртқа» денсаулық көпірі жобасы аясында соңғы 3 жылда жалпы саны – 44 дәрігер келді. Олар өз тәжірибелерімен бөлісіп, құнды ақпараттар берді.

Шетелдік танымал дәрігер Алп Ержан да оқу ордамыздың білікті дәрігерлерімен бірлесе науқастарға кеңес беріп,  бірнеше күрделі ота жасады. 

Соның бірі – Түркістан облысында алғаш рет нерв трансплантациясы бойынша ота өтті. Айтулы отаны университетіміздің түлегі, қазіргі таңда клиникамызда еңбек етіп жүрген нейрохирург Айбол Сансызбаев пен Алп Ержан жасады. Бұл  ота облымыздың денсаулықсақтау саласының тарихынан орын алды. Ота көлік апатының салдарынан зардап шеккен 18 жасар науқасқа жасалды. Науқастың оң иық нервтерінің травматикалық үзілуі нәтижесінде оң қолы 80%-ға салданып қалған. Ота барысында науқастың мойын омыртқаларынан бастау алған иық нервтерінің үш тармағы, екібасты, төртбасты және трапеция тәрізді арқа бұлшықетінің нервтерімен бірлестірілді.      

Сонымен қатар, Алп Ержан клиникамыздың хирургтарымен бірге өрт күйігінен кейінгі контрактура болған науқастың қолына рекоструктивті ота жасады. Оталардың барлығы сәтті аяқталды. Алдағы уақытта шетелдік маманмен басқа да күрделі оталар бойынша бірлесе жұмыс істеу шаралары жоспарлануда.