Жаңалықтар

Университетіміз QS World University Rankings 2026 жаһандық рейтингінде 848-орыннан 761–770 аралығына көтерілді. Бұл оқу ордамыздың 80-нен астам позицияға жоғарылағанын білдіреді.

Университетіміздің бұл жетістігі – интернационалдандыру, бәсекеге қабілеттілікті арттыру және халықаралық академиялық қауымдастықпен ынтымақтастықты күшейту бағытында жүргізілген жүйелі жұмысының нәтижесі.

QS ресми есебіне сәйкес, университет келесі көрсеткіштер бойынша айтарлықтай ілгеріледі:

Faculty/Student Ratio (оқытушылар мен студенттер санының арақатынасы): 157 позицияға жоғарылап, әлем бойынша 316-орынға ие болды. Бұл академиялық әлеуетінің артқанын көрсетеді.

International Students Diversity: университетіміз 503-орынға көтеріліп, 13 елден келген студенттермен мультимәдени орта қалыптастырды.

Sustainability (тұрақты даму): көрсеткіш 56 позицияға жақсарып, университет бұл бағытта әлемнің үздік 650 ЖОО қатарына енді.

International Students: 31 позицияға өсу байқалды, яғни шетелдік студенттерді тарту стратегиясы жоғары нәтиже көрсетті.

Айта кетейік, Қазақстан бойынша рейтингке енген 20 университеттің ішінде Қожа Ахмет Ясауи атындағы Халықаралық қазақ-түрік университеті 7-орынға ие болды. Ал халықаралық ғылыми-зерттеу желісі, студент-оқытушы арақатынасы және шетелдік оқытушылар үлесі бойынша еліміздегі үздік 4 жоғары оқу орнының қатарына кірді.

Университетіміздің ректоры Жанар Темірбекова бұл жетістікке үлес қосқан ұстаздарымызға, студенттерімізге және халықаралық серіктестерімізге алғыс білдірді.

«QS рейтингіндегі позициямыздың нығаюы – университетіміздің жаһандық интеграция, ашықтық және тұрақты даму жолында жоспарлы түрде ілгерілеуінің нәтижесі. Біз бұл жетістікке үлес қосқан ұстаздарымызға, студенттерімізге және халықаралық серіктестерімізге алғыс білдіреміз», – деді ол.

Бұл жетістік – 2024–2029 жылдарға арналған Университетті дамыту бағдарламасын табысты жүзеге асыру жолындағы маңызды кезеңдердің бірі. Бағдарламаның негізгі басымдықтары – академиялық шеберлік, интернационалдандыру және ғылыми-зерттеу экожүйесін нығайту.