Жаңалықтар

Биыл Кентау қаласының құрылғанына 70 жыл толды. Шаһардың мерейтойына арналған ең үлкен мерекелік шара «Ынтымақ» алаңында кең көлемде өтті. Салтанатты шараға университетіміздің өкілдері де қатысып, марапатқа ие болды.

Мерекелік күн көрмелер мен жәрмеңкеден бастау алып, театрландырылған қойылыммен жалғасты. Онда Кентаудың өткен тарихы, кеншілердің ерен еңбегі мен қаланың даму жолы көрініс тапты. Концерттік бағдарламада жергілікті өнерпаздармен қатар еліміздің танымал эстрада жұлдыздары өнер көрсетіп, мерекенің сәнін келтірді.

Салтанатты іс-шарада Кентаудың өркендеуіне елеулі үлес қосқан бірқатар азаматтарға арнайы марапаттар табысталды. Олардың қатарында университетіміздің ректор өкілі м.а., Инженерия факультетінің деканы Нажи Генч те бар. Ол Кентау қаласына сіңірген еңбегі үшін «Кентау қаласына – 70 жыл» мерекелік медалімен марапатталды.

Айта кетерлігі, университетіміздің Инженерия факультеті Кентау қаласында орналасқан. Факультет ондаған жылдан бері жастарға сапалы білім беріп, аймақтың әлеуметтік-экономикалық дамуына өз үлесін қосып келеді. Бүгінде факультет түлектері өндіріс, құрылыс, технология және инженерия салаларында табысты еңбек етіп, Кентаудың ғана емес, тұтас өңірдің дамуына қызмет етуде.

Бұл марапат – университетіміздің білім мен ғылым саласын дамытуға қосқан үлесінің, сондай-ақ Кентаудың өркендеуіне атсалысып жүрген ұстаздар мен студенттердің еңбегіне берілген жоғары баға.