Жаңалықтар

Университетіміздің ректор өкілі м.а Нажи Генч пен Халықаралық байланыстар департаментінің директоры Фурхат Дадажанов Түркі Мемлекеттері Ұйымы жанындағы Түркі Университеттер Одағының (ТҮРКІУО) VIII Бас ассамблеясына қатысып жатыр. 

Өзбекстан Республикасының Ташкент қаласында өтіп жатқан айтулы басқосуда бірқатар маңызды мәселелер қаралды. Қатысушылар күн тәртібіне сай, ең алдымен, Түркі Университеттер Одағына мүше болуға жаңа университеттердің ұсынған өтініштерін талқылады.

Сонымен қатар,  Түркі Университеттер Одағын және Орхун алмасу бағдарламасын жетілдіру жөніндегі ұсыныстарды қарастырды. Түркі Мемлекеттері Ұйымы Хатшылығының Түркі Университеттер Одағы мен Орхун алмасу бағдарламасына тұрақты хатшылық пен арнайы бағдарламалық қор құру туралы және одақты нығайтуға байланысты Түркия мемлекеті тарапынан ұсыныстар айтылды. Сондай-ақ,  Венгрия тарапы Орхун алмасу бағдарламасы мен Түркі Мемлекеттері Ұйымының бірлескен «Ғылыми зерттеу, технологиялық даму және жаңашылдық» қорына қатысты ақпарат берді.

Басқосу соңында Түркі Академиясы қатысушыларға  «TürkBarometer» зерттеу жобасының 2024–2025 жылдардағы нәтижелерін таныстырды.