Оқу ордамыздың Кентау кампусында Қазақ, орыс тілдері бөлімінің ұйымдастыруымен «Инновация және тіл: түркі жастарын біріктіретін күш» атты ашық сабақ өтті.
Ашық сабақтың мақсаты – «Қазақ тілі туыс тіл ретінде» электронды оқулығы негізінде студенттердің тілдік дағдыларын дамытуға бағытталған заманауи әдістемелерді таныстыру.
Жиынға Академиялық мәселелер жөніндегі вице-ректоры Эльмира Идрисова мен Дайындық орталығының оқытушы-профессорлары, қызметкерлері мен тыңдаушылары қатысты.
Айта кетейік, «Қазақ тілі туыс тіл ретінде» электронды оқулығы – оқу орнымыздың Дайындық орталығының Қазақ, орыс тілдері бөлімі оқытушыларының авторлық төл туындысы.
Заманауи форматта әзірленген оқулықта тілдік біліммен қатар ұлттық құндылықтар, мәдениет пен рухани мұра кеңінен қамтылған. Сонымен қатар, бейнематериалдар мен интерактивті тапсырмалар арқылы білім алушылардың тілдік құзыретін жан-жақты дамыту көзделген.
Шараға түркі дүниесінен келіп, білім алып жүрген студенттер қатысып, қазақ тілінде еркін сөйлеп, өз ойларын жеткізді. Ашық сабақта тіл үйренудің тәжірибелік тәсілдері көрсетіліп, студенттердің коммуникативтік қабілеттерін дамытуға басымдық берді.
Сабақ барысында сөйлеу әрекетінің төрт түрі – оқылым, тыңдалым, жазылым және айтылым бойынша түрлі тапсырмалар орындалып, рөлдік ойындар ұйымдастырылды. Сондай-ақ, сахналанған көріністер мен практикалық жұмыстар тілдің тек теориялық білім емес, шынайы қарым-қатынас құралы екенін көрсетті.
Жиын тіл мен инновацияны ұштастыра отырып, түркі жастары арасындағы рухани және мәдени байланысты нығайтуға бағытталған мазмұнды алаңға айналды.
KZ
TR
EN
RU
