ҒАЛЫМДАРЫМЫЗ МАҢЫЗДЫ ХАЛЫҚАРАЛЫҚ ҒЫЛЫМИ-ПРАКТИКАЛЫҚ КОНФЕРЕНЦИЯҒА ҚАТЫСТЫ
![image](admin/resimler/haberler/buyuk/65cca514258e0_ҒЫЛЫМИ_ПРАКТИКАЛЫҚ_КОНФЕРЕНЦИЯ_1.jpg)
2-3 ақпан күндері Өзбекстанның Ташкент қаласында Халықаралық Ислам Академиясында – «Адамдық бауырластық пен дінаралық диалог – халықаралық ынтымақтастықтың факторы» атты халықаралық ғылыми-практикалық конференциясы өтті.
Аталған конференцияға университетіміздің Теология факультетінің ғылым жөніндегі декан орынбасары — аға оқытушы, PhD Бауыржан Сайфунов, Дінтану кафедрасының меңгерушісі — аға оқытушы, PhD Фэриде Камалова және Филология факультетінің аға оқытушылары: Ләззат Рысбекова Мөлдір Қыздарбекова қатысты.
Айта кетейік, халықаралық ғылыми шараға Халықаралық Ислам Академиясының шақыртуымен Италия, Мысыр, Біріккен Араб Әмірліктері, Қазақстан және Өзбекстан мемлекеттерінің ғалымдары да келді.
Конференцияға қатысушы ЮНЕСКО-ның, Бүкіләлемдік Мұсылмандар қауымдастығының, Рим Католик шіркеуі өкілдерінің баяндамалары негізінен «Бауырластық һәм тыныштық» тақырыптары аясында өрбіді.
Ғылыми іс-шара барысында Халықаралық Ислам Академиясының ректоры Гафуров Уйгун Толкинұлы Ахмет Ясауи университеті арасындағы жұмыстарды жан-жақты жандандыру керектігі жөнінде ерекше ықыласпен атап өтті.
Ғылыми іс-шараның ресми бөлімінен соң оқу ордамыздың оқытушылары университетаралық қатынастарды дамыту аясында Халықаралық Ислам Академиясының дінтану және исламтану бағытында мамандар дайындайтын кафедралардың оқытушы-профессорлар құрамымен кездесті. Кафедра меңгерушілері мен оқытушы-профессорлар құрамы ғылыми-зерттеу жұмыстарын бірлесе жүргізу, маман дайындау, академиялық ұтқырлық бағдарламасы шеңберінде білімалушылар мен оқытушыларды тағылымдамадан өткізу сынды т.б жұмыстар жоспарын түзу сияқты мәселелерді ақылдасып, талқылады.
Ғылыми іс-шараның келесі кезеңі ғылыми-тарихи-мәдени таныстырылыммен жалғасты. Конференция қонақтары Халықаралық Ислам Академиясының оқу корпустарымен, ғылыми кітапханасы, академияның сирек қолжазбалар сақтау қорымен танысты.
Ары қарай қатысушылар Өзбекстан астанасының қақ ортасында орналасқан Шайхантаур (Шайх Ховенди әт-Тахур) кешенінде мәңгілік тыныс тауып жатқан атамыз Төле би баба кесенесіне зиярат жасалып, тағзым етті.
Конференция соңында қатысушыларға арнайы сертификаттар табысталды.