Оқу орнымызда өткен ересектер арасындағы Асық ату бойынша Азия чемпионаты өз мәресіне жетті.
Аталған халықаралық дода ҚР Туризм және спорт министрлігінің қолдауымен, сондай-ақ «Самұрық-Қазына» қоры мен «СпортҚорының» демеушілігімен ұйымдастырылды.
Чемпионаттың басты мақсаты – ұлттық спорт түрлерін дамыту, жастар арасында асық ату ойынын кеңінен насихаттау және оның халықаралық беделін арттыру болды.
Биылғы жарысқа Азия және іргелес өңірлерден келген 12 елдің ұлттық құрамалары қатысты. Олардың қатарында Қазақстан, Түркия, Қырғызстан, Өзбекстан, Тәжікстан, Түрікменстан, Моңғолия, Ресей Федерациясы (Саха Республикасы), Қытай, Үндістан, Пәкістан және Әзірбайжан бар.
Чемпионат бағдарламасы бойынша ерлер асық ату, ал әйелдер командалары «Бес асық» түрінен сынға түсті. Екі күнге созылған жарыс барысында қатысушылар жоғары деңгейдегі мергендік пен ептіліктерін көрсетті.
Университетімізде Азия чемпионатының жабылу салтанаты да өтті. Онда жарыс қорытындысы бойынша үздік атанған спортшылар арнайы кубоктар, медальдар және бағалы сыйлықтармен марапатталды.
Чемпионаттың жоғары деңгейде өтуіне Қожа Ахмет Ясауи атындағы Халықаралық қазақ-түрік университеті мен өңірлік Асық ату федерациясы зор үлес қосты.
Бұл чемпионат ұлттық спорттың халықаралық деңгейде танылуына жол ашып, Азия елдері арасындағы достық пен мәдени байланысты нығайта түсті.
KZ
TR
EN
RU
