Оқу орнымыз қазығын қаққан Түркістан қаласы жаңа мүмкіндіктерге жол ашып жатыр. Күні кеше ҚР Парламенті Мәжілісінде «Түркістан қаласының ерекше мәртебесі туралы» Қазақстан Республикасы Заңының жобасы бірінші оқылымда қабылданды.
Мәжіліс төрағасы Ерлан Қошановтың қатысуымен өткен отырыста Мемлекет басшысының қаламызға рухани және тарихи орталық ретінде ерекше мәртебе беру тапсырмасына сәйкес әзірленген Заң жобасы бірауыздан қолдау тапты.
Мұндай маңызды заңның әзірленуіне Түркі мемлекеттері ұйымының Түркістан қаласын түркі әлемінің рухани астанасы ретінде тануы, сондай-ақ қаланың тарихи келбетін және оның аумағында орналасқан тарихи-мәдени мұра объектілерін сақтау қажеттілігі негіз болғанын атап өтпеске болмас.
Заң жобасын талқылау 1,5 сағатқа созылып, депутаттар тарапынан түрлі пікірлер мен сауалдар жолданды. Оны әзірлеу барысында Ұлыбритания, Италия, Өзбекстан, Әзербайжан және тағы басқа елдердің тарихи ескерткіштерін сақтап қалу тәжірибелері зерттелді. 4 тараудан және 15 баптан тұратын жаңа заң Түркістан қаласын Қазақстан Республикасының рухани-мәдени және тарихи орталығы ретіндегі ерекше мәртебесін айқындайтын құқықтық негіздерді қамтып отыр. Әр бап, әр тарап Парламент депутаттарының қызу талқысынан өтіп, нәтижесінде бірінші оқылымда-ақ қабылданды.
Ерекше мәртебе тек қаламызға ғана емес, университетіміздің дамуына да серпін береді. Түркістанның өсіп-өркендеуі студенттер үшін жаңа мүмкіндіктер мен заманауи жағдайлар ұсынады. Бірге дамып, бірге жарқын болашаққа қадам басайық!
KZ
TR
EN
RU
